Anarâš kandâ halijdij jotteeđ sämikielân rippâškoovlâ, Ucjuuvâst tot luhostui
Aanaar servikodde ij paste orniđ rippâškoovlâ anarâškielân.

Jietna: Rippâškovlâlâš Pessi Koskinen.
Jietna

Rippâškovlâlâš Pessi Koskinen.
Pessi Koskinen, anarâškandâ Anarist, halidij jotteeđ rippâškoovlâ sämikielân. Aldemus sämikielâlâš rippâškovlâ kavnui Ucjuuvâst. Sun lâi vuosmuš anarâškielâ sárnoo sämikielâlii rippâškoovlâst.

Škoovlâ kiellân lâi tavesämikielâ, mut tot ij hettim iberdem.

– Koolgâi hárjániđ iberdiđ eenâb orjâlâškielâ. Mun sarnum tiäđust-uv anarâškielâ maassâd, mut iähân toh ain iberdâm, muštâl Koskinen.

Kirholiih teevstah, ruhâdâsah, oskotubdâldâsah, págutmâšah kávnojeh anarâškielân. Pessi Koskinen luuvâi-uv taid jieijâs kiellân, anarâškielân. Meid iskosijd sun uážui toohâđ anarâškielân.

Ijjâ kirhoost

Riippaškovlâ Ucjuuvâst piištij oho. Majemuu iijâ škovlâliih viettii kirhoost.

– Tot aainâs-uv paasij mielân. Jiem vissásávt lah ovdil lam kirhoost iijâ, iätá Koskinen.

Muuneeld koolgâi čuággiđ “messumeerhâid”, moh kuleh rippâškoovlân.

– Jiemhân mun finnim taid, jiem viiššâm vyelgiđ ain kiirkon. Mut iähán toh loppâloopâst tärhistâmgin taid, muštâl Pessi.

Rippâškoovlâst lâi ohtân uássin meid diakoniapargo, mast škovlâliih ellii iššeedmin puáris ulmuid. Pessi Koskinen eelij muorâpargoid porgâmin oovtâ áákun.

Stuárráámus suijâ manen Pessi Koskinen halidij jotteeđ rippâškoovlâ, lijjii skeeŋkah. Tot ij lamaš kuittâg áinoo suijâ.

– Kal mun tohon halijdim vyelgiđ. Tiäđust-uv ohtâ suijâ lâi vissásávt ruttâ, tuubdâst Koskinen.

Anarâškielân ij pyevti tääl jotteeđ rippâškoovlâ

Kuittâg tääl ij lah máhđulâš čođâldittiđ rippâškoovlâ anarâškielân. Kolgâččij leđe ucemustáá käävci škovlâlid, et pastaččij orniđ rippâškoovlâ anarâškielân, muštâl Aanaar servikode kirkkohiärrá Tuomo Huusko.

– Mottoom ihe talle, mun irâttim porgâđ korrâsávt tom oovdân, et ličij rippâškovlâ anarâškielân, mut ohtâgin ij puáttám, iätá Huusko.

Jietna: Anaar kirkkohiärrä Tuomo Huusko
Jietna

Anaar kirkkohiärrä Tuomo Huusko
Tääl lii máhđulâš moonnâđ Ucjuuvâ sämikielâlii rippâškoovlân já tobbeen puáhtá sárnuđ, nuuvt tave-, ko meid anarâškielâ.

Anja Kaarret
Yle